Geguritan ribute PSSI

Pak, endi balku?

Dening : Rahmad Fauzi

embuh ngapa

embuh apa

embuh...

bal bunderku nggembos

iki dudu papan politik pak

kuwi dudu papan saingan mas

simbah

iki piye mbah..?

endi...endi kawruhmu mbiyen?

tulungi aku...

tumindake nyasar kabeh, ora dadi tuladha

mumet ora karuan

kisruh dadi apalan

padu dadi kulinan

tanpa nemu dalan,

endi...endi bal ku?

jeleh aku krungu

rumangsamu kuwi nggone sapa?

rumangsamu kuwi ki apa?

dudu dolanan

iki indonesia mas, iki indonesia pak

indonesia kuwi siji

kawicaksanan mu kang diarep-arep,

balekna bal ku ...

Geguritan kangge Pak Pemimpin

“wis ora percaya”

Dening : Rahmad Fauzi

taun taun kepungkur,

akeh kang kesengsem ucapmu

akeh kang kepencut kabeh janjimu

akeh kang bungah melu panemu mu

aku,

tukang sapu melu tresna karo kabeh polahmu

pangajab sapu biting iki iso dadi sapu emas

emas kang bisa gawe wareg putra lan garwa

kawicaksananmu gawe kenceng anggonku nggegem sapu iki,

nanging kabeh mung ana cangkem

kesel,

kesel aku,

mayuta yuta wong kapusan

saiki ...

sapuku tugel,

garwa putraku durung rasa wareg

sandanganku gombal amoh, dudu jas ana awakmu kuwi

umahku gedhek bolong, dudu jamban larangmu kuwi

tumpakanku onthel tua, dudu motor mabur anyarmu kuwi

ajeg ...

cangkem adoh saka kasunyatan,

haiya kasunyatan urip Indonesiaku iki

aku butuh,

aku butuh kang nyata

dudu ucapmu kang wus kabur,

apa perlu sapuku iki dadi penthung??